RTSH Sport Live

Teuta dhe Partizani shkëlqejnë, “paqe” në Laç dhe Fier

  • 08/11/2020
  • |
  • Futboll Vendi
Teuta dhe Partizani shkëlqejnë, “paqe” në Laç dhe Fier

Rezultate surprizë në katër ndeshje të Kategorisë Superiore, Tirana bie përballë Teutës, Partizani gjen fitoren në sfidën me Kukësin, barazim mes Laçit dhe Kastriotit, Apolonia merr pikën e parë

Skuadra kampione e Tiranës është thyer në shtëpi(në fakt ndeshja është luajtur në Pogradec) përballë Teutës së Durrësit. Gjithçka është vendosur nga një gol i Lorenco Vilës në pjesën e parë të takimit. Është pikërisht minuta e 32-të, që i ka dhënë mundësinë skuadrës bregdetare të ekzekutojë një goditje dënimi, e cila është kthyer në gol pas gjuajtjes me kokë të Vilës.

Partizani ka arritur të gjejë suksezin në përballjen me Kukësin duke marrë një fitore 2-0. Pas një pjese të parë pa shumë histori, të kuqtë kanë arritur të zhbllokojnë rezultatin në minutën e 60-të me anë të Kardozo,i cili ka goditur saktë me të majtën brenda zonës së verilindorëve. Goli i dytë është shënuar nga Solomon në minutën e 88-të, i cili, i pashqetësuar mes mbrojtjes së skuadrës kundërshtare, e ka dërguar topin në rrjetë, 2-0.

Laçi është befasuar në shtëpi nga Kastrioti, në një sfidë që është mbyllur në barazim 1-1. Vendasit kaluan të parët në avantazh me anë të Mustës në minutën e 48-të. Atëherë kur mendohej se gjithçka kishte përfunduar, është Plaku që ka shënuar për krutanët, minuta e 90+2 dhe barazim 1-1.

Apolonia ka arritur të marrë pikën e parë në këtë edicion, duke barazuar 2-2 në shtëpi përballë Bylisit. Fierakët e nisën mirë sfidën duke shënuar dy herë, Haxhiu 7’ dhe Mihana 18’. Por Bylis arriti të reagojë duke barazuar me dy gola të Ndrecës, 27’ dhe 69’.